Sham fir dhali tanhaiyon ki gehma-gehmi me,
Raat aa rahi hai chhipti-chhipati
Chandni ka oat liye,
Raat fir aa rahi hai…..teri yaadon ka bojh liye..
Raat fir aa rahi hai…..aur neend chali
Mujhe alvida kiye.
Wah chamakta chand fir mujhe dekh muskata hai..
Nisha ko baahon me bhar shaan se ithlata hai.
Wah chamakta chand fir mujhe tarsata hai…
Aks dikha tere chehre ki…baadalon me chip jata hai.
Tare tim-timate palken jhapkate mere saath
Jag rahe hain…
Main jala hoon kisi k khayalon k beech….
Shayad wo v kisi ki yaadon ko saath liye jal rahe hain.
Sird hawa sehlati badan ko nikal gayi,
Palkon ko pighalte dekha,to zara teher gayi,
Puccha fir “aage kyun nahi badhta hai….
Kyun sang mere na chalta hai…??”
“jo bhool chuke tujhe..arsa beet gaya…
Tu kyun unhe bhool nhi jata hai??”
Koshish to bahut ki hai...use bhool jane ki,
Koshish to bahut ki hai is...aag ko bujhane ki,
Koshish to bahut ki hai...fir nayi lau jalane ki,
Koshish to bahut ki hai...ruthi zindagi ko manane ki.
Palken jhuki…fir se un nazron ki gehraiyon me
doob jata hoon…
Palken uthi..har taraf use hi pata hoon…
Har koshish bus koshish ban kar reh jati hai,
Zindagi mujhe fir usi mod par chhor jati hai.
